ಶಿಲ್ಪಾ ಶೆಟ್ಟಿ: ನಾನು ಕರ್ನಾಟಕದ ಹೆಣ್ಣುಮಗಳು ಎಂಬ ಹೆಮ್ಮೆ ಇದೆ ಹುಬ್ಬಳ್ಳಿಗೆ ಮೊದಲ ಬಾರಿಗೆ ಭೇಟಿ ನೀಡಿದ ಬಾಲಿವುಡ್ ನಟಿ ಶಿಲ್ಪಾ ಶೆಟ್ಟಿ, ಹುಬ್ಬಳ್ಳಿಯ ಹಬ್ಬದ ಸಂಭ್ರಮ, ಜನರ ಉತ್ಸಾಹಕ್ಕೆ ಮೆಚ್ಚುಗೆ ವ್ಯಕ್ತಪಡಿಸಿದರು. ಹುಬ್ಬಳ್ಳಿಯ ಜನರ ಜೋಶ್ ಸೂಪರ್ ಎಂದ ನಟಿ, ಗರ್ಬಾ ನೃತ್ಯ ಮಾಡಿ ಸಂಭ್ರಮಿಸಿದರು.
ನಾನು ಕರ್ನಾಟಕದ ಹೆಣ್ಣುಮಗಳು, ಬಂಟ ಸಮುದಾಯದವಳು, ಕರ್ನಾಟಕದ ಸಂಸ್ಕೃತಿಯ ಬಗ್ಗೆ ಹೆಮ್ಮೆ ಇದೆ. ನೃತ್ಯಕ್ಕೆ ಭಾಷೆ ಇಲ್ಲ, ಅದೊಂದು ಭಾವನೆ. ದೇವರಿಗಾಗಿ ಮನಸ್ಸು ತುಂಬಿ ನೃತ್ಯ ಮಾಡಬೇಕು. ನಾನು ದೇವಿಯ ಪರಮ ಭಕ್ತೆ" ಎಂದರು.
ಕಾಂತಾರ ಸೇರಿದಂತೆ ಕನ್ನಡ ಚಿತ್ರರಂಗದ ಪ್ಯಾನ್ ಇಂಡಿಯಾ ಬೆಳವಣಿಗೆಗೆ ಮೆಚ್ಚುಗೆ ವ್ಯಕ್ತಪಡಿಸಿದ ಶಿಲ್ಪಾ ಶೆಟ್ಟಿ, ನಟ ಯಶ್ ಕನ್ನಡ ಚಿತ್ರರಂಗಕ್ಕೆ ದೊಡ್ಡ ಹೆಸರು ತಂದುಕೊಟ್ಟಿದ್ದಾರೆ ಎಂದರು. ಕನ್ನಡ ಸಿನಿಮಾದಲ್ಲಿ ನಟಿಸಲು ಅವಕಾಶ ಸಿಕ್ಕರೆ ಇಲ್ಲ ಎನ್ನುವುದಿಲ್ಲ ಎಂದ ನಟಿ, ಮುಂಬರುವ ರಾಮಾಯಣ ಚಿತ್ರತಂಡಕ್ಕೆ ಶುಭ ಹಾರೈಸಿದರು.
