ಪೋರ್ಟ್ ಹಾರ್ಕೋರ್ಟ್ (ನೈಜೀರಿಯಾ): ಆಫ್ರಿಕಾದ ಪ್ರಮುಖ ತೈಲ ಉತ್ಪಾದಕ ರಾಷ್ಟ್ರವಾದ ನೈಜೀರಿಯಾದ ದಕ್ಷಿಣ ಭಾಗದಲ್ಲಿರುವ ರಿವರ್ಸ್ ಸ್ಟೇಟ್‌ನಲ್ಲಿ ಕಚ್ಚಾ ತೈಲವನ್ನು ಕದಿಯಲು ಹೋದ 37 ಮಂದಿ ವಿಷಕಾರಿ ಹೊಗೆಯನ್ನು ಸೇವಿಸಿ ಉಸಿರುಗಟ್ಟಿ ಸಾವನ್ನಪ್ಪಿದ್ದಾರೆ. ಸ್ಥಳೀಯ ಕಚ್ಚಾ ತೈಲ ಸಂಸ್ಕರಣಾಗಾರವೊಂದರಲ್ಲಿ ಅಕ್ರಮವಾಗಿ ತೈಲವನ್ನು ಟ್ಯಾಂಕ್‌ಗೆ ತುಂಬಿಸುವ ಪ್ರಯತ್ನದಲ್ಲಿದ್ದಾಗ ಈ ದುರಂತ ಸಂಭವಿಸಿದ್ದು, ಘಟನೆಯ ಪೂರ್ಣ ವಿವರ ಇಲ್ಲಿದೆ: ಹೇಗಾಯಿತು ದುರ್ಘಟನೆ? ನೈಜೀರಿಯಾದ ರಿವರ್ಸ್ ಸ್ಟೇಟ್‌ನ ಇಬಾ ಸಮುದಾಯದ ವ್ಯಾಪ್ತಿಯಲ್ಲಿರುವ ಅಕ್ರಮ ತೈಲ ಸಂಸ್ಕರಣಾ ಕೇಂದ್ರವೊಂದರಲ್ಲಿ, ಗುರುವಾರ ಮಧ್ಯರಾತ್ರಿ ಓಕಾರಿ ಜೆಟ್ಟಿ ಸಮೀಪ ಹಡಗೊಂದು ತೈಲವನ್ನು ಲೋಡ್ ಮಾಡಿಕೊಳ್ಳುತ್ತಿದ್ದ ಸಂದರ್ಭದಲ್ಲಿ ಈ ಘಟನೆ ಸಂಭವಿಸಿದೆ. ಇಂದೋರಾಮ ಎಲಿಮೆ ಪೆಟ್ರೋಕೆಮಿಕಲ್ಸ್‌ನಿಂದ ಪೋರ್ಟ್ ಹಾರ್ಕೊರ್ಟ್ ರಿಫೈನರಿ ಮೂಲಕ ರಫ್ತು ಹಡಗುಗಳಿಗೆ ಕಚ್ಚಾ ತೈಲ ಸಾಗಿಸುವ ಪೈಪ್‌ಲೈನ್‌ಗೆ ತೂತು ಕೊರೆದು, ಅಕ್ರಮವಾಗಿ ತಮ್ಮ ದೋಣಿಗಳಿಗೆ ತೈಲ ತುಂಬಿಸಿಕೊಳ್ಳಲು ಯುವಕರು ಯತ್ನಿಸಿದ್ದರು. ಈ ವೇಳೆ, ಅಲ್ಲಿ ಉಂಟಾದ ವಿಪರೀತ ಬಿಸಿಯಿಂದಾಗಿ ವಿಷಕಾರಿ ಕಾರ್ಬನ್ ಮಾನಾಕ್ಸೈಡ್ ಮತ್ತು ಇತರೆ ಅನಿಲಗಳು ಹೊರಹೊಮ್ಮಿವೆ. ಇವುಗಳನ್ನು ಉಸಿರಾಡಿದ 37 ಮಂದಿ ಸ್ಥಳದಲ್ಲೇ ಉಸಿರುಗಟ್ಟಿ ಸಾವನ್ನಪ್ಪಿದ್ದಾರೆ. ಏತನ್ಮಧ್ಯೆ, ಮೃತಪಟ್ಟವರಲ್ಲಿ ಕಚ್ಚಾ ತೈಲ ಕಳ್ಳತನದ ದಂದೆಯಲ್ಲಿ ತೊಡಗಿದ್ದ ಸ್ಥಳೀಯ ಯುವಕರು ಮತ್ತು ಇಬ್ಬರು ಗರ್ಭಿಣಿಯರು ಸೇರಿದ್ದಾರೆ ಎಂದು ಸ್ಥಳೀಯ ಭದ್ರತಾ ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ. ನೈಜೀರಿಯಾದಲ್ಲಿ ಈ ಸಮಸ್ಯೆ ಸಾಮಾನ್ಯ ಯಾಕೆ? ನೈಜೀರಿಯಾ ಆಫ್ರಿಕಾದಲ್ಲೇ ಅತಿ ಹೆಚ್ಚು ತೈಲ ಉತ್ಪಾದಿಸುವ ದೇಶಗಳಲ್ಲಿ ಒಂದಾಗಿದೆ. ಆದರೆ, ನೈಜರ್ ಡೆಲ್ಟಾ ಪ್ರದೇಶದಲ್ಲಿ ತೈಲ ಸಂಪತ್ತು ಅಪಾರವಾಗಿದ್ದರೂ, ಅಲ್ಲಿನ ಜನರು ತೀವ್ರ ಬಡತನ ಮತ್ತು ನಿರುದ್ಯೋಗದಿಂದ ತತ್ತರಿಸಿದ್ದಾರೆ. ಇತ್ತೀಚಿನ ಆರ್ಥಿಕ ಬಿಕ್ಕಟ್ಟು ಹಾಗೂ ಹಣದುಬ್ಬರ ಜನರನ್ನು ಇಂತಹ ಅಪಾಯಕಾರಿ ಕೃತ್ಯಗಳಿಗೆ ದೂಡುತ್ತಿದೆ. ಹಾಗಾಗಿ, ಅಲ್ಲಿನ ಪ್ರಮುಖ ಪೈಪ್‌ಲೈನ್‌ಗಳನ್ನು ಒಡೆದು ಕಾನೂನುಬಾಹಿರವಾಗಿ ಕಚ್ಚಾ ತೈಲವನ್ನು ಕದಿಯುವುದು ಮತ್ತು ತಾವೇ ಸ್ವತಃ ಕಾಡುಗಳ ಮಧ್ಯೆ ಅಕ್ರಮ ರಿಫೈನರಿಗಳನ್ನು ನಿರ್ಮಿಸಿ ಸಂಸ್ಕರಿಸುವುದು ದೊಡ್ಡ ದಂದೆಯಾಗಿದೆ. ಇಂತಹ ಸುರಕ್ಷತೆಯಿಲ್ಲದ ಅಕ್ರಮ ಕೇಂದ್ರಗಳಲ್ಲಿ ಆಗಾಗ ಭಾರಿ ಬೆಂಕಿ ಅವಘಡಗಳು ಮತ್ತು ಇಂತಹ ವಿಷಗಾಳಿ ದುರಂತಗಳು ಸಂಭವಿಸುತ್ತಲೇ ಇರುತ್ತವೆ.